АҞӘА, ажьырныҳәа 29 – Sputnik, Бадри Есиава. Гагра араион ахада Заур Бганба инапынҵақәа шышьҭаиҵаз атәы иҳәеит, ашәахьаҽны ажьырныҳәа 29 рзы.
"Сгәабзеира аҭагылазаашьа иахҟьаны снапынҵақәа аансыжьуеит, иахьа уи атәы зҳәо арзаҳал снапы аҵасыҩит", — иҳәеит заур Бганба Sputnik Аԥсны акорреспондент даниҿцәажәоз.
Заур Бганба диит хәажәкыра 26 1951 шықәса рзы. 1974 шықәса рзы Краснодартәи аполитехникатә институт ауаажәларреи ааглыхратә ргылареи рзы афакультет аҿы иҵара хиркәшеит.
1993 шықәса инаркны 1995 — нӡа Гагра араион ахада ихаҭыԥуаҩс дыҟан. 1995 инаркны 2005- нӡа Бзыԥтәи амҿтәы зауад дахагылан. 2005 шықәса инаркны иахьа уажәраанӡа Гагратәи абнатә нхамҩа напхгара аиҭоит.
Аџьынџьтәылатәи еибашьра далахәын, Леон иорден ианашьоуп. Дҭаацәароуп, хҩык ахәыҷқәа драбуп.
Заур Бганба Гагра араион ахадас даҭан Аԥсны ахада Рауль Ҳаџьымба инапынҵала 2016 шықәса лаҵарамзазы. Иара диԥсахит Беслан Барцыц, атәыла Ахада иусбарҭа напхгаҩыс даныиарга ашьҭахь.
