АҞӘА, ажьырныҳәа 30– Sputnik, Бадраҟ Аҩӡба. Ашьапылампыл азы адунеи ачемпионат-2018 аламҭалаз Ростов ақалақь аҿы имҩаԥысраны иҟоуп ашьапылампыл азы аҿар рыбжьара атурнир. Уахь анаԥхьара аҭоуп Аԥсны ҳәа радио Sputnik иазеиҭеиҳәеит Ростовтәи аобласт аҟны иҟоу Аԥсны аҳаҭыртә консул Адик Аршба.
Адунеи ачемпионат аламҭалаз ашьапылампыл азы атурнир аиҿкаара иалацәажәан Ростовтәи аобласт Ахәаахәҭра-ааглыхратә палатаҿ, адипломатиатә миссиақәа рхаҭарнакцәа адыԥхьаланы.
"Атурнир иалахәхоит ақалақь-еишьцәа. Аҟәа акәзар, қалақь-партниоруп. Аҟәа атурнир иалахәхома ҳәа санҵаа исарҳәеит ааԥхьара Аҟәаҟа ишырышьҭхьо", — иҳәеит иара.
Аиԥылара иалахәын Ермантәыла, Белоруссиа, Венгриа, Македониа, Монако, Аԥсны, Франциа, Испаниа рыхәаахәҭратә хаҭарнакрақәеи аконсулрақәеи рхаҭарнакцәа.
"Инаԥхьо рҟынтәи 13 команда атурнир ахалархәра ишақәшаҳаҭу азы адырра ҟарҵахьеит", — иҳәеит иара.
Ашьапылампыл азы адунеи ачемпионат мҩаԥысуеит 2018 шықәса рашәарамза 14 инаркны ԥхынгәымза 15 рҟынӡа Москва, Калининград, Санкт-Петербург, Волгоград, Казань, Нижни Новгород, Самара, Саранск, Ростове-на-Дону, Екатеринбург, Шәача ақалақьқәа рҟны.
