АҞӘА, жәабран 1 – Sputnik. Аԥсны иҟоу урыстәылатәи арратә база аррамаҵзурауаа аруаа разыҟаҵара агәаҭаразы имҩаԥыргеит агәаҭарақәа зхала иныҟәо артиллериатә хысгақәа "Акация", агаубицақәа Д-30, 120-мм, аминометқәа "Сани" рхархәарала. Ахысрақәа мҩаԥган "аӷа" итәарҭеи амшын десанти ирықәкны. Абри атәы ааицҳаит арратә округ апресс-маҵзура аиҳабы Вадим Астафьев.
"Аӷа" изы адыррақәа ахысырҭа ҭыԥқәа рнапхгараҭарахь инарышьҭуеит аԥрыгатә аппаратқәа "Тахион" аҟынтә, аԥшыхәратәи аимадаратәи аппаратқәа "Стрелец" аҟынтә", — иҳәеит Астафьев.
Адырраҭараҟны иара убасгьы иҳәоуп ихароу аобиектқәа рышьаҽразы аруаа ахархәара шрырҭоз автомашьынақәа "Урал" ирықәыргылоу ареактивтә системақәа "Град". Хысрацыԥхьаӡа артеллиристцәа рҭыԥ рыԥсахуан.
Мчыбжьык иназынаԥшуа имҩаԥысуаз ауснагӡатәқәа ирылахәын арратә техника 500ак, зықьҩык аррамаҵзурауаа, ахархәара рыҭан атанкқәа Т-72Б3, акәалӡтәы ԥшыхәратә машьынақәа "Дозор", аимадара машьынақәа, акәылӡтәы транспартиорқәа БТР-80.
Изаамҭанытәиз агәаҭарақәа мҩаԥган арратә округ ар реиҳабы, аинрал-полковник Александр Дворников инапхгарала.
Вадим Астафьев иазгәеиҭеит агәаҭарақәа реихшьаалақәа инарықәыршәаны аррамаҵзурауаа разыҟаҵара ҵыԥхтәи ашықәс иадкыланы уахәаԥшуазар 20 процент ишазҳаз.
Аррамаҵзурауаа аԥсихологиатә гәаҭарақәагьы ирхыжьын, ҳаамҭазтәи акомпиутортә система ахархәарала. Асолдаҭцәа рморалтә ҭагылазаашьа ахәшьара аҭан.
