АҞӘА, жәабран 2 – Sputnik, Сариа Кәарацхьелиаԥҳа. Аԥсуа шәаҳәаҩы Валера Маиромиан аолимпиада иалахәхараны иҟоу аспортсменцәа адгылара рыҭо аклип ҭижьит. Иахьазы иара иахәаԥшхьеит 5000-ҩык рҟынӡа ауаа. Абри атәы Sputnik акорреспондент илзеиҭеиҳәеит ашәаҳәаҩ ихаҭа.
"Сынтәа урыстәылатәи аспортсменцәа адгылара рҭахуп. Сара ирацәаҩны исымоуп аҩызцәа, аспортсменцәа. Ибзианы издыруеит хықәкык уманы уҽаназыҟауҵо, аха рацәак еилкаам хҭысқәак рзы уи ухықәкы уанацәыхдырҟьо. Сара исыӡбеит абри авидео ала аспортсменцәа адгылара рысҭарц", — иҳәеит ашәаҳәаҩ.
Валера жәабран 1 азы Instagram аҿтәи идаҟьаҿы абри иклип ӡыригеит. Иара иахәаԥшхьеит 5000-ҩык рҟынӡа ауаа.
"Уажәы сара избоит имаҷҩымкәа аспортсменцәа шахәаԥшхьо. Урҭ ашәҟәқәа сзырҩит", — иҳәоит Маиромиан.
Валера Маиромиан иҳәоит арысҟаҩык ауаа аклип иахәаԥшып, еиднакылап ҳәа дшыҟамыз.
"Еицырдыруа аспортсменцәа: Александр Кокорин, Алан Дзагоев, Дима Ӷәазаа, Денис Царгәыш уҳәа ирацәаҩуп аклип аҭыхра иалахәыз", — ҳәа еиҭеиҳәоит ашәаҳәаҩ.
Ашәаҳәаҩ иажәақәа рыла аспортсменцәа рҭыхра аамҭа маҷымкәа иагеит.
"Ирацәаҩуп ашәҟәы ззызҩыз, аклип рҽаладырхәырц иаасыԥхьаз. Абри аус аҟны ацхыраара сиҭеит Дмитри Ӷәазаа", — иҳәоит Валера.
Аклип аҭыхраҿы Валера Маиромиан ацхыраара ирҭеит ҳаспортсмен Дмитри Ӷәазааи Аҟәа ақалақь аспорти аҿари русқәа рзы Аилаки.
