АҞӘА, жәабран 6 – Sputnik. Ашоколад конфеҭқәа "Марс" ҳара ҳзы шәарҭара рылам лҳәеит радио Sputnik аинтервиу азҭаз ареспублика асанитартә ҳақьым хада Лиудмила Скорик.
"Ашоколад ҳара ҳахь иахьынтәаарго Урыстәылантәи ауп. Уаҟа ауп иахьыҭрыжьуа арахь иаанаго аалыҵ. "Марс" ахатәы аалыҵ Аԥсны исымбац. Усеиԥш акрыҟазар, ҳара иаадыруан, дыррак ҳаурын", — лҳәеит Скорик.
Асанитартә ҳақьым илҳәеит Урыстәыла асеиԥш проблемак аҭыԥ аманы иҟазар, Роспотребнадзор ҳаргьы адырра ҳарҭахьазаарын ҳәа.
Афатә аалыҵ ашәарҭадаразы амаҵзура (АПБ), адыррақәа рыла аилахәыра "Марс" иагәҭакуп атауар дырга Galaxy Smooth Milk и Maltesers Fun Size змоу аалыҵ шьҭахьҟа аргьыжьра.
