АҞӘА, жәабран 14 – Sputnik, Бадраҟ Аҩӡба. Константин (Кумф) Ломиа дазышәаҳәон асовет уаа рыԥсҭазаара ҳәа Sputnik акорреспондент изеиҭеиҳәеит АБИГИ афольклор аҟәша аусзуҩ, алитературадырыҩ, акритик Владимир Агрба.
"Кумф аԥсуа литературахь данцәырҵ аамҭаз усҟантәи аԥсуа литература ахаҭарнакцәа Леонти Лабахәуа, Самсон Ҷанба арепрессиа рзырухьан, ҿыц аҩра иалагаз Қьаазым Агәмаа, Сандро Кәычбериа, Леуарса Кәыҵниа афронт аҟны еибашьуан", — иҳәеит Владимир Агрба.
Кумф Ломиа диццәырҵит Алықьса Лашәриагьы.
Константин Ломиа аҩра далагеит заа. Иара ирҿиамҭаҿ аҭыԥ ҷыда ааннакылон аграждантә лирика. Владимир Агрба иазгәеиҭеит иара алитература еиԥш ауаажәларратә усурагьы активла дшалахәыз.
"Иара дышқәыԥшӡаз ауаажәларратә ԥсҭазаара иҽалаирхәит. Аԥсны ашәҟәыҩҩцәа Реидгыла амаӡаныҟәгаҩыс дыҟан, ҿыц аҩра иалагаз ишилшоз ала дрыцхраауан. Иара дыздыруаз зегьы уаҩы ҳалалк иакәны дыргәаладыршәоит", — иҳәеит Агрба.
Иԥсҭазаара далҵит 1999 шықәса рзы.
