АҞӘА, жәабран 22– Sputnik, Сариа Кәарацхьелиаԥҳа. Аспорттә аиндаҭлареи аиқәԥаратә ҟазареи рзы VIII иаарту афестиваль "Кубок Равноапостольного Николая Японского" иалахәыз рҟынтә аԥснытәи аспортсменцәа хәҩык аԥыжәаратә ҭыԥқәа ааныркылеит. Афестиваль мҩаԥысуан Москватәи аобласт аҟны. Абри атәы ҳкорреспондент илзеиҭеиҳәеит аспортсменцәа разыҟаҵаҩ Демис Адлеиба.
"Аԥснынтәи ааҩык аспортсменцәа афестиваль иалахәын. Урҭ рҟынтәи хәҩык аҩбатәии ахԥатәии аҭыԥқәа ааныркылеит. Аҩбатәи аҭыԥқәа ааныркылеит: Софиа Аҩӡыԥҳа, Анри Адлеиба, Самир Хәарцкиа, Ерик Ходжоиан, Артур Ходжоиан, ахԥатәи аҭыԥқәа ааныркылеит – Сариа Хупориеи Кирилл Пачкориеи", – иҳәеит иара.
Атренер иажәақәа рыла аспортсменцәа ԥыҭҩык рықәгылашьа игәамԥхеит.
"Анри Адлеиба – Адунеи ачемпион. Арахь афинал аҟны дииааит адунеи ачемпионат ахь зынӡагьы имнеицыз аспортсмен. Убас ихьит Ерик Ходжоиангьы. Уи адунеи ачемпионат аҟны дызиааиз, уажәы диҵахеит", — иҳәеит Демис Адлеиба.
Аспорттә аиндаҭлареи аиқәԥаратә ҟазареи рзы VIII иаарту афестиваль "Кубок Равноапостольного Николая Японского" иалахәын 500-ҩык рҟынӡа аспортсменцәа Урыстәылеи, Аԥсни, Донецктәи Жәлар рреспубликеи рҟынтәи.
