АҞӘА, хәажәкыра 1 – Sputnik, Амра Амҷԥҳа. Аекологиеи аԥсабара ахьчареи рзы Аҳәынҭеилакаҿы аус зуа агидрометиорологиа аҟәша аиҳабы инапынҵақәа назыгӡо Амир Цәышба иҳәеит ҳазҭалаз хәажәкырамза ақәагьы амрагьы ацны ишыҟоу.
Амир Цәышба иҿцәажәара шәазыӡырҩыр ҟалоит абра>>
"Ҳара ишазыԥхьагәаҳҭоз еиԥш амза алагамҭазы амш еиласит, ақәоура иалагеит. Аԥсуаа ирҳәон абир аамҭазы аӡыни ааԥыни рҽеилдыргоит ҳәа", — иҳәоит иара.
Цәышба иазгәеиҭоит уажәшьҭа мшыцәгьаҵәҟьак ҟалом ҳәа.
"Ҳара иҳалшоит жәамш рҟынӡа заа амш ҟалап ҳәа агәаанагара шьақәҳарӷәӷәар, аха ҷыдала ҩба-хԥа мшы рыҩныҵҟа иҟало ауп иаадырҵәҟьо. Ҳара ашәахьаҽны иаҳҳәахьан амза 1 азы амш цәгьахоит ҳәа. Жәабранмза анҵәамҭаз амш акыр иԥхан, 18 градус рҟынӡа инаӡон. Иахьа уажәы 8 градуск рҟынӡа илаҟәит", — иҳәеит иара.
Иара убри аан 2012 шықәса рзы хәажәкырамза 12, 17, 18, 19 рзы аҳауа 1-2 рҟынӡа ихьшәашәаран.
Иара ишиҳәо ала зӷьыра 10-15 метра иҟоу аԥша аԥырхага знаҭар зылшо иажәхьоу, здац кәадахахьоу аҵлақәа роуп.
"23 метра рҟынӡа инеиуа аԥша ауадаҩрақәа аԥнаҵар алшоит, аха усеиԥш ҟалоит ҳәа ҳазҳәом. Ҳазыԥхьагәаҭарақәа усеиԥш ҳдырбом", — иҳәеит иара.
