АҞӘА, хәажәкыра 7 — Sputnik, Бадраҟ Аҩӡба. Актәи атуристтә форум-цәыргақәҵа "VISIT APSNY" еицеиҿыркааит Ахәаахәҭра-ааглыхратә палатеи атуризм азы Аԥснытәи Аидгылеи. Актәи атуристтә форум-цәыргақәҵа "VISIT APSNY" аартра атәы далацәажәеит атуризм азы аԥснытәи Аидгыла апрезидент Анна Калиагина.
"Ауснагӡатә аҳәаақәа ирҭагӡаны имҩаԥгахоит арт-маркет, иааԥхьахоит афольклортә ансамбльқәа. Иазырхиоуп атуристтә программа еиуеиԥшым Аԥсны аҭыԥԥшӡарақәа рахь, афестиваль "Амимоза ашәҭра", — лҳәеит Калиагина.
Лара лажәақәа рыла аԥхьатәи амш аҽны имҩаԥгахоит астол гьыжьқәа, аиҿцәажәарақәа.
Хәажәкыра 9-10 рзы имҩаԥгахоит атуристтә маршрутқәа.
Калиагина илҳәеит афорум-цәыргақәҵа "Аԥсны аҭаара" аҟны аԥснытәи атуристтә фирмақәеи аилахәырақәеи, асасааирҭақәеи, апроекттә биуроқәеи, акадртә маҵзурақәеи уҳәа шалахәхо.
Актәи атуристтә форум-цәыргақәҵа "VISIT APSNY" еицеиҿыркааит Ахәаахәҭра-ааглыхратә палатеи атуризм азы аԥснытәи Аидгылеи.
