АҞӘА, хәажәкыра 13 – Sputnik, Сариа Кәарацхьелиаԥҳа. Марттәи ажәылараҿ иҭахаз ргәалашәара иазку аконцерт мҩаԥгахоит Ражьден Гәымба ихьӡ зху Аԥснытәи Аҳәынҭқарратә филармониаҿы ҳәа ҳкорреспондент илеиҳәеит Акультура аминистрра аҟазауаҩ хада Адамыр Гәынба.
Аконцерт иалахәхоит Аԥсны зҽаԥсазтәыз артист Давид Терзиан напхгара зиҭо Аԥсны Аҳәынҭқарратә камертә оркестр, Адыгатәи ареспублика Аҳәынҭқарратә филармониа асимфониатә оркестр артистцәа, Шәачатәи асимфониатә оркестр артистцәа.
"Аконцерт иалагоит асааҭ 18.00 рзы, хәажәкыра 13 аҽны. Иара еиҿнакааит Аԥсны Акультура аминистрра. Аиҿкаара далахәуп Есма Џьениаԥҳа", — иҳәеит иара.
Аконцерт апрограмма шьақәгылоуп аклассикатә музыка арҿиамҭақәа рыла. Инагӡахоит Лиудвиг ван Бетховен исимфониа № 5. Асимфониа №5 Бетховен иҩит 1804-1808 шықәсқәа раан. Асимфониа иара убасгьы еицырдыруеит Schicksalssymphonie ҳәа (Schicksals – судьба).
Марттәи ажәылараан иҭахеит 222-ҩык аԥсуа еибашьцәа, 30-ҩык рҟынӡа хабарда ибжьаӡит.
