АҞӘА, хәажәкыра 23 – Sputnik, Бадраҟ Аҩӡба. Гәдоуҭатәи ахәыҷтәы шьапылампылтә команда "Риҵа" ахԥатәи аҭыԥ аанакылеит Урыстәылазегьтәи ашьапылампылтә турнир HOPES CUP "Весенний Кубок SOCHI 2018" аҟны. Абри атәы Sputnik иазеиҭеиҳәеит акоманда азыҟаҵаҩ Гоча Цулаиа.
![Детская команда ФК Рица Детская команда ФК Рица - Sputnik Аҧсны](https://cdnn1.img.sputnik-abkhazia.info/img/102346/98/1023469852_0:0:1280:853_600x0_80_0_0_7e6bf1bd2b865afac52c6c9ad5c4cf9e.jpg)
"Ҳара ҩынтәуп атурнир ҳхы алаҳархәуеижьҭеи. Ҵыԥх аԥшьбатәи аҭыԥ аанаҳкылеит", — иҳәеит иара.
Атурнир аԥҟаррақәа инарықәыршәаны гәыԥ-цыԥхьаӡа ԥшьба-ԥшьба команда алахәуп. Агәыԥтә раунд аҿы гәдоуҭатәи ашьапылампыласыҩцәа х-хәмаррак ихәмарит. Урҭ рҟынтәи ҩынтә москватәи акоманда "Химки" (1:0) батаисктәи акоманда "ДЮСШ-2" (2:0) ириааиит. "Спартак-Алания" ианацыхәмаруаз 3:1 ҳәа иаҵахеит.
![Детская команда ФК Рица Детская команда ФК Рица - Sputnik Аҧсны](https://cdnn1.img.sputnik-abkhazia.info/img/102346/97/1023469724_0:0:1280:850_600x0_80_0_0_b55818fba0e22dc287cf5e7de307008e.jpg)
Афинал аԥшьбабжаҿы "Риҵа" нальчиктәи "Спартак" иацыхәмаруан. Аамҭа хада хыркәшахеит – 0:0 ҳәа. пенальти амҩаԥгараан "Риҵаа" 5 мпылк ҭадыршәит, 4 рыцәцеит.
Афиналбжаҿы москватәи "Динамо" иеиндаҭлон. "Акоманда даара иӷәӷәоуп. Акыр иҳаԥыргеит. 7:1" ҳәа ҳаҵахеит – иҳәеит азыҟаҵаҩ.
Ахԥатәи аҭыԥ азы аиндаҭлараан "Риҵа" аҽазныкгьы "Спартак-Алания" иацыхәмарит, аиааирагьы агеит 3:1 ҳәа. Иааидкыланы атурнир иалахәын 12 команда.
![Детская команда ФК Рица Детская команда ФК Рица - Sputnik Аҧсны](https://cdnn1.img.sputnik-abkhazia.info/img/102346/97/1023469793_0:0:1280:851_600x0_80_0_0_d3c7296f6ae6bcdc707118e503c649de.jpg)