АҞӘА, хәажәкыра 26– Sputnik, Сариа Кәарацхьелиаԥҳа. Аԥсны имҩаԥысуа Жәларбжьаратәи акинофестиваль ажиури алкаауп ҳәа аанацҳауеит акинофестиваль Аҟәатәи апресс-маҵзура.
"Ажиури иалахәуп: Аԥсны жәлар рартист, акинорежиссер, асценарист Виачеслав Аблоҭиа, арежиссер, асценарист Владимир Фенченко, Урыстәыла зҽаԥсазтәыз артист, арежиссер Сергеи Пускепалис, акинорежиссер, асценарист, акомпозитор Михаил Местецки, апродиусер, актриса Елена Гликман. Ажиури ахантәаҩы –акинорежиссер, асценарист, апродиусер Анна Меликиан", – ҳәа аанацҳауеит апресс-маҵзура.
Аконкурстә программахь иалхуп 32 фильм. Афестиваль аиҿкааҩ Илона Хәарцкиаԥҳа лажәақәа рыла афестиваль иалахәхоит Европа, ИАР ртәылақәа, Урыстәыла, Марокко, Тунис, Кореиа.
Мшаԥымза 2 — 6 рзы Аԥсны имҩаԥысраны иҟоуп Жәларбжьаратәи акинофестиваль.
