АҞӘА, мшаԥы 10– Sputnik. Аиҭашьақәыргыларатә усурақәа хыркәшахар алшоит мшаԥымза анҵәамҭазы иҳәеит радио Sputnik аҟны АУН "Аԥсныавтомҩа" адиректор Борис Ачба.
"Аобект асметат ахәԥса 31 миллион мааҭ итәоит", — иазгәаиҭеит иара.
2018 шықәсанӡа 1500 метра акаҭран ықәҵан. Зынӡа амҩа ахы инаркны аҵыхәанӡа 4 километрак инаӡоит.
"1500 метра акаҭран ықәаҳҵеит 2017 шықәса рзы. Уажәы аусурақәа аамҭала иаанкылоуп. Абитум ҳазыԥшуп. Волгоградынтәи иҳаураны ҳаҟоуп. Ԥшьбаҟа мшы ҳаԥшыроуп. Уаанӡа ақәаршҩыцарҭақәа еиҭашьақәдыргылоит", — иҳәеит иара.
Аремонт иалагаанӡа Адыгаа рымҩа даара аҭагылазаашьа уадаҩны иҟан ҳәа азгәеиҭоит Ачба.
"Ҳара ҳусурақәа Иашҭхәа ақыҭа аҟынтәи ҳрылагеит. Уаҟагьы аҭагылазаашьа акырӡа иуадаҩын. Акырӡа шықәса уаҩ даламкьысыцызт. Ҳәарада, аԥара ахьазымхоз ҳныԥшуан, аха акгьы ҟаумҵар аасҭа ирацәамзаргьы ак ҟауҵар еиӷьуп", — иҳәеит иара.
Адыгаа рымҩа аиҭашьақәыргылара хацыркын 2017 шықәса рзы. Арахь иаҵанакуеит ақәаршҩытә ӡцарҭақәеи аӡымҩангагақәеи рышьҭаҵара, ацҳақәа рмаакырақәа рықәыргылара, иара акаҭран ахаҭа ақәҵара.
