АҞӘА, мшаԥы 16— Sputnik. Иаҭахханы иҟалар Америка аҽазныкгьы Шьамтәыла иажәлоит лҳәеит ООН иҟоу ЕАШ (США) ахаҭарнак ҷыда Никки Хеили.
"Ҳара ҳазыхиоуп аҽазныкгьы шьамтәылатәи арежим аҭыԥ арбара", — лҳәеит Хеили ООН Ашәарҭадаратә хеилак аилатәараҟны данықәгылоз.
"Иахьа ашьыжь Дональд Трампи сареи ҳаицәажәон. Иара иҳәеит шьамтәылатәи арежим аҽазныкгьы ахимиатә жәылара мҩаԥнагар дшазыхио иракетақәа уахь рынашьҭра", — лҳәеит лара.
ЕАШ (США), Британиа, Франциа асабша ашьыжь аракетақәа рыла Шьамтәыла аиҳабыратә хыбрақәа иреихсит. Асааҭ 3.42 инаркны асааҭ 5.10 рҟынӡа Шьамтәыла иалажьын 100 инарзынаԥшуа ракета.
Урыстәыла арратә мчрақәа аҭагылазаашьа рхы аларымгалеит. Урыстәыла Ахада Владимир Путин ахҭыс исуверентәу аҳәынҭқарра агрессиа азҭо хҭысуп ҳәа азиҳәеит.
