АҞӘА, мшаԥы 24– Sputnik, Сариа Кәарацхьелиаԥҳа. Ростовтәи атурнир иалахәыз аԥснытәи акаратистцәа ахьтәы медалқәа фба роуит ҳәа Sputnik иазааицҳаит косики карате азы Аԥсны Афедерациа апрезидент Демис Адлеиба.
Актәи аҭыԥқәа ааныркылеит: Дмитри Адлеиба, Ҭимур Быҭәба, Ерик Ходжоиан, Артур Ходжоиан, Софиа Аҩӡба, Самир Хәарцкьиа.
Иара убасгьы аԥснытәи аспортсменцәа ираҭәашьахеит аразны медалқәа ҩбеи аџьаз иалху амедалқәа аки.
"Иааидкыланы ачемпионат иалахәын 11-ҩык аспортсменцәа. Урҭ рҟынтәи ҩыџьа: Мариа Хупориеи Сариа Хупориеи аҩбатәи аҭыԥқәа ныркылеит, ахԥатәи аҭыԥ никылеит Нарҭ Арсалиа", — иҳәеит Адлеиба.
Ростовтәи аобласт аҿы есышықәса имҩаԥысуа косики карате азы аицлабра иалахәын 500-ҩык рҟынӡа аспортсменцәа. Аԥснытәи аспортсменцәа раԥхьаӡа акәны атурнир рҽаладырхәит.
