"Ԥшьышәҩык ахәыҷкәа ахьыҟаз Аԥснытәи аспортсменцәа қәыԥшцәа ааба инаркны жәеиза шықәса рҟныӡа зхыҵуаз, даараӡа ибзианы иқәгылеит. Аҩбатәи ахԥатәи аҭыԥқәагьы раанкылара ус имариамызт", — иҳәеит Игор Бериа.
Азыҟаҵаҩ иазгәеиҭеит аспорт аҟны, хымԥада, аиҩызара шыҟоу, амала ақәԥаҩцәа ауарҳал ахь ианцәырҵо иаҳа иӷәӷәоу аиааира игоит. Аиндаҭлара, аисара ыҟоуп иара азыҟаҵаҩцәа рыбжьарагьы.
"Аспорт аҟны аиндаҭлара, аисара ыҟазароуп. Усҟан ауп алҵшәагьы аныҟало, ахәыҷқәа аҟазшьа анроуа, ҳаргьы иаҳҭахуп аџьабаа анаҳба ҳааӡамҭацәа аиааира ныркыларц", — иҳәеит Игор Бераиа.
Лаҵара быжьба инаркны жәабанӡа Даӷьысҭан имҩаԥысуеит Урыстәыла ачемпионат. Еиуеиԥшым аицлабрақәа рҟны аиааира згаз, жәаф шықәса рҟынӡа зхыҵуа жәҩык ҳаспортсменцәа уи иалахәхоит. Уаҟа аԥхьахәтә ҭыԥқәа аанызкылаз Европа ачемпионат рхы аладырхәуеит.
