АҞӘА, мшаԥы 30– Sputnik, Бадраҟ Аҩӡба. Акурорттә сезон аан Аԥсни Урыстәылеи еимардоит адәыӷбақәа хәба, иҳәеит Sputnik аинтервиу азҭаз АУН "Абхазская железная дорога" аиҳабы ихаҭыԥуаҩ Игорь Марганиа.
"Москватәи Питертәи адәыӷбақәа ҩбеи, Самаратәи дәыӷбаки ауааԥсыра рымаҵ рулоит. 216-тәи адәыӷба Аҟәа-Санкт-Петербург акәзар, аграфик аҿы иҟоуп, аха макьаназы абилеҭқәа рыҭира иаламгацт. Апассаџьырцәа рацәахар, уи адәыӷбагьы дәықәырҵоит", — иҳәеит иара.
Арҭ ареисқәа рҟынтәи адәыӷба Аҟәа-Москва заҵәык ауп ашықәс зегьы иныҟәало иҳәеит иара.
"Иааиԥмырҟьаӡакәа, ашықәс зегьы иныҟәоит адәыӷба №306", — иҳәеит Марганиа.
Адәыӷба Аҟәа-Москва-Курск аныҟәара иалагоит ԥхынгәы 2 инаркны.
"Адәыӷба авагонқәак Белгородҟа ицалоит. Адәыӷба Самара-Аҟәа аныҟәара иалагоит ԥхынгәы 13 инаркны. Адәыӷба Аҟәа-Санкт-Петербург иамоуп авогонқәа Псков, Ростов, Воронеж ицо", — иҳәеит Игорь Марганиа.
2018 шықәса рзы Аҟәеи Санкт-Петербурги еимаздо раԥхьатәи адәыӷба амҩа иқәлеит мшаԥы 30 рзы, ԥхынгәымзеи нанҳәамзеи рзы иара есыҽны иныҟәалоит.
