Мшаԥы 26 рзы Санкт-Петербург имҩаԥысит Урыстәыла аректорцәа реидгыла ажәеизатәи Аизара ду. Уи ихы алаирхәит Урыстәыла ахада Владимир Путин. Аделегатцәа рхыԥхьаӡара фышә-ҩык инарзынаԥшуан. Дара рыбжьара иҟан егьырҭ аҳәынҭқаррақәа руниверситетқәа рнапхгаҩцәагьы. Аректорцәа реизара ду аҟны дықәгылеит Урыстәыла ахада, иара убас аҵара аминистр, ауниверситетқәа рнапхгаҩцәа.
"Ирҳәоз ақәгыларақәа рҿы акы акәын Урыстәыла иахьа изҭагылоу зегьы ирдыруеит. Иҟоуп апроблемақәа даара ирацәаны, уи асанкциақәа мацара ракәӡам изыхҟьо, иҟоуп егьырҭ амзызқәагьы. Убарҭ зегьы рыӡбаразы иалацәажәон иреиҳау аҵараиурҭақәа иҟарҵаша. Ас еиԥш аизарақәа ҳанрылахәу ҳаргьы ҳәхыцуеит ҳтәылаҟны иҟаҳҵаша. Аус зцаҳуа аҳәынҭқарра ду аҟны асанкциақәа рацәак ирнымԥшырц "ахәшә" рыԥшаауеит. Ҳара ара «хәшәыс» иҳамоу акоуп – аҽеидкылара. Рацәак аҟәардәқәа ирышьҭоу ҳрыхәаԥшроуп аус шыруа. Ари азҵаараҟны аԥхашьара аарԥшра аҭахым. Имаҷымкәа аиԥыларақәа сыман, аректорцәа рыбжьара ҳҩызцәа даара ирацәоуп, ҳацхраара иазхиоуп.Ихадароу аҵара, аусуроуп. Анаука уҽазыукызар, даҽаџьара ухьамԥшкәа уи уаҿызароуп. Абри зхысҳәаауа, Петербург даара акрызҵазкуа аизара мҩаԥысит, иара Урыстәыла ахадагьы ибеит апотенциал дууӡа шыҟоу итәылаҟны аҵарадырреи аҭҵаарадырреи рганахьала", — иҳәеит Гәарамиа.
