"Хра злоу ахҭысқәа": Нанба Аибашьра Дуӡӡа афырхацәа рҳамҭакәа ирызкны
"Аибашьра Ду иалахәыз рхыԥхьаӡара иахьазы шәҩык рҟынӡа ыҟоуп. Ҳара асовет аамҭазы ииз ауаа зегьы ныҳәа дус иҳамаз, апатриотизм ҳалазҵаз Маи 9 рзы иҟалаз Аиааира ду ауп", — иҳәеит Нанба.
Иара иазгәеиҭеит Аџьынџтәылатә еибашьра Ду аан изыхәҭаны аҳамҭақәа змауз Аԥсны ишмаҷҩым. Ус еиԥш иҟоу рҭоурых ҭырҵаауеит. Убас Аԥсны ахада иусԥҟала Ааибашьра Ду аҟны зҽалызкааз аибашьцәа гәыԥҩык ҳҳәынҭқарраҟны иреиҳау арратә ҳамҭа ранашьан. Урҭ амедалқәа хара имгакәа рыуацәа рнапаҿы ирыҭахоит.
"Аԥсны Афырхаҵа ҳәа ахьӡ рыхҵоуп Асовет Еидгыла афырхаҵара иаԥсахаз, уи азы иҟоу ашәҟәқәа ҳхы иархәаны ауп аҳамҭақәа аҭынхацәа ишраҳҭо. Асовет Еидгыла иахьа иҟам, афырхацәа зтәылауааз Аԥсны ауп", — ҳәа азгәеиҭеит Нанба.
