АҞӘА, лаҵара 8— Sputnik. Ермантәылатәи Апарламент лаҵара 8 рзы далырхит атәыла Аԥыза-министр ҿыц – афракциа "Елк" ("Исход") ахада, аоппозициа раԥхьагыла Никол Пашиниан. Абри атәы аанацҳауеит РИА Новости.
"Елк" адагьы Пашиниан икандидатура адгылара арҭон аполитикатә париақәа ҩба — "Блок Царукяна"; "Дашнакцутюн". Апарламент аҿы арҭ ах-партиак 47 депутаттә мандат рымоуп. Аминистрцәа реилазаара анапхгаразы иахәҭаны иҟоуп 53 бжьы.
Абжьыҭира аҩбатәи атур аан Никол Пашиниан изы рыбжьы рҭиит 49-ҩык адепутатцәа, иҿагыланы рыбжьы рҭиит 42-ҩык. Пашиниан иалхра алыршахеит Ермантәыла ареспубликатә партиа алахәылацәа рыбжьыҭирала.
Абжьыҭира актәи атур аан иара изы рыбжьы рҭиит 45-ҩык адепутатцәа.
