АҞӘА, лаҵара 14 – Sputnik, Бадри Есиава. Аԥснытәи акаратистцәа хҩык "Азиа Ахраҿа" аҟны амедалқәа ранашьахеит. Урҭ аҩныҟа иааргоит "ахьы", "аразны", "аџьаз" ҳәа иҳәеит Sputnik адырра азҭаз Аԥсны косике карате Афедерациа апрезидент Демис Адлеиба.
"Хҩык Аԥснытәи аспортсменцәа иалахәын атурнир. Рыхҩыкгьы амедалқәа ранашьахеит. Жә-шықәса зхыҵуа Софиа Аҩӡыԥҳа ахьтәы медал ланашьахеит, быжь-шықәса зхыҵуа Нарҭ Арсалиа аразны медал ианашьахеит, жә-шықәса зхыҵуа Мариа Хупориа аџьаз медал ланашьахеит", — иҳәеит Адлеиба.
Иара иазгәеиҭеит Аԥснытәи акаратистцәа раԥхьаӡа акәны абри атурнир ишалахәыз. Уаанӡагьы анаԥхьарақәа роухьан, аха афинанстә ҭагылазаашьа иахҟьаны изымцацызт. 2018 шықәса рзы афинанстә цхыраара ҟарҵеит ахәыҷқәа рҭаацәеи абаҩрҵәыреи аспорти рзы Аҳәынҭқарратә еилаки.
Карате азы есышықәсатәи Жәларбжьаратәи атурнир "Азиа Ахраҿа" мҩаԥысуеит Барнаул лаҵара 10 — 15 рзы. Иара иалахәуп 11 тәыла рыспортсменцәа.
Барнаултәи аиндаҭларақәа раан Аԥснытәи аспортсменцәа нарыԥхьеит Жәларбжьаратәи атурнир "Тунис Ахраҿахь".
