АҞӘА, лаҵара 15 – Sputnik, Бадри Есиава. Аԥснытәи аделегациа аҭааит Ҟарачы-Черқьессктәи аул Кара-Паго аҟны 2017 шықәса цәыббрамзазы иаадыртыз Владислав Арӡынба ихьӡ зху ашкол ҳәа еиҭеиҳәоит Аԥсны аҳәынҭқарратә политиказы Аилак ахантәаҩы Баҭал Ҳагәышь.
"Абаза поет Микаель Чикатуев иубилеи азгәаҭарахь ҳнарыԥхьеит. Ҟарачы-Черқьессктәи аул Кара-Паго аҟны 2017 шықәса цәыббрамзазы Владислав Арӡынба ихьӡ зху ашкол шаадыртыз дыруа, ҳара уи ашкол ҳаҭааит, арҵаҩцәеи аҵаҩцәеи рҿаԥхьа ҳақәгылеит", — ҳәа еиҭеиҳәоит Баҭал Ҳагәышь.
Иара убасгьы иҳәеит аделегациа ашкол ахь ҳамҭак аҳасаб ала ишнаргаз Владислав Арӡынба изку ашәҟәқәа, агәаларшәагатә ԥсарқәа.
Аул Кара-Паго ашкол аҵаҩцәа Владислав Арӡынба иира амш инадҳәаланы еиҿыркааит аконцерт. Ашкол аҟны еиҿкаауп Владислав Арӡынба ифотосахьақәа рыстенд.
"ААУ аректор Алеко Гәарамиа ихьӡала ашкол аушьҭымҭацәа ауниверситет аҭаларазы ааԥхьара раҳҭеит. Ауниверситет иҭало хәыда-ԥсада азеиԥшнхарҭаҿы аҭыԥқәа роуеит", — иҳәеит иара.
Аделегациа иалахәын Адәныҟатәи аусқәа рминистрра, Аԥсуа ҭҵааратә институт аусзуҩцәа, аҳәынҭқарратә бызшәатә политиказы Аилак ахаҭарнакцәа, ААУ астудентцәеи, арҵаҩцәеи.
