АҞӘА, рашәара 6 – Sputnik. IV Жәларбжьаратәи акультура афестиваль "Ауаҩы игыларҭа" мҩаԥысраны иҟоуп Аҟәа, рашәара 13-15 рзы лҳәеит Аԥсны Акультуреи аҭоурых-культуратә ҭынха ахьчареи рзы аминистр Ельвира Арсалиаԥҳа.
"Афестиваль аартра амш аҽны, Фазиль Искандер ихьӡ зху Аурыс драматә театр аҿы имҩаԥысуеит аспектакль "Алахьыҭбаа" апримиера. Арежиссер Искандер Сакаев иқәыргыламҭа аспектакль аԥсуа хәаԥшыҩцәа рзы акрызҵазкуа культуратә хҭысны иҟалап ҳәа сгәыӷуеит", — лҳәеит лара.
Искандер Сакаев ибзиаӡаны идыруеит Фазиль Искандер ирҿиамҭақәа, убри азоуп аспектакльгьы режиссиорс аҟалара зигәаԥхаз, лҳәоит аминистр.
"Сакаев Искандер ирҿиамҭақәа убриаҟара ибзианы идыруеит, алитератураҭҵааҩцәагьы иџьаршьартә. Фазиль Искандер ифонд адиректор Шьазина Агрԥҳа иҳалҳәеит иӡбахә. Ҳара арежиссиорцәа р-Гильдиахь ашәҟәы ҳашьҭит. Абас ҳаинырит Искандер Сакаеви ҳареи", — лҳәеит Арсалиаԥҳа.
Лара иара убасгьы иазгәалҭеит алитературатә мҩақәҵага "Искандер и-Аԥсны" шаздырхиаз, 2018 шықәса рашәарамза 14 рзы ишӡыргахо Гагра иазку амҩақәҵага.
"Ахсаала еиқәлыршәеит Сариа Нанԥҳа, лара аидеиа гәыкала дазнеиит, асахьаҭыхыҩ иҳасаб ала длыдлыԥхьалеит Мадина Ҷкәатуаԥҳа. Аӡыргара мҩаԥысраны иҟоуп Аҟәа, Аҿар рыҩнаҿы", — лҳәеит лара
Рашәара 14 рзы Аҟәатәи ақәыԥшцәа рыҩнаҿы имҩаԥгахоит асахьаҭыхратә еиндаҭлара. Иара убри аҽны ауп алитературатә мҩақәҵага "Искандер и-Гагра" анӡыргахогьы.
Рашәара 15 рзы афестиваль хыркәшахоит Аԥсуа ҳәынҭқарратә драматә театр аҿы зметраж кьаҿу анимациатә фильм арбарала.
IV Жәларбжьаратәи акультура афестиваль "Ауаҩы игыларҭа" мҩаԥысраны иҟоуп Аҟәа, рашәара 13-15 рзы.
Фазиль Абдул-иԥа Искандер диит хәажәкыра 6, 1929 шықәса рзы, Аҟәа. 1954 шықәса рзы далгеит А.М. Горки ихьӡ зху Алитературатә институт. Ҩы-шықәса рышьҭахь дхынҳәуеит Аԥсныҟа, Аҳәынҭшәҟәҭыжьырҭа аԥсуа ҟәша аредакторс. 1956 инаркны иҩымҭақәа ркьыԥхьуан ажурналқәа: "Смена", "Неделя", "Костер", "Сельская молодежь" уҳәа рыҟны. Раԥхьатәи иажәеинраалақәа реизга "Горные тропы" ҭыҵит 1957 шықәса рзы Аҟәа. 1966 шықәса рзы ажурнал "Новый мир" аҟны икьыԥхьын аповест — "Созвездие Козлотура". Искандер ирҿиамҭақәа ирылукаартә иҟоуп "Сандро из Чегема" (1973-1988, автобиографиатә ҩымҭа). Искандер иажәабжьқәеи иповестқәеи еиҭагоуп шамахамзар европатәи абызшәақәа зегьы рахь.
