АҞӘА, рашәара 11– Sputnik, Бадраҟ Аҩӡба. Х-нызқь тонна абӷанҷ зқәу аидарамҩангага ӷба Аԥсны амшынбаӷәазаҟынтәи Ҟрымҟа амҩа иқәлоит ашәахьа, рашәара 11 рзы.
Аӷба аидара ақәҵара сааҭқәак иагоит, ахәылԥаз иара амҩа иқәлоит.
"Ишыжәдыруа еиԥш, ииасыз ашықәс азы Аԥсны-Урыстәылатәи аусутә форум аҟны аилаӡара напы аҵаҩын Аԥснынтәи Ареспублика Ҟрымҟа абӷанҷ анагаразы. Ари раԥхьатәи усхкуп. Ашықәс нҵәаанӡа Ҟрымҟа инарышьҭраны иҟоуп 200 нызқь тонна абӷанҷ", — иҳәеит Аԥсны аекономика аминистр Адгәыр Арӡынба.
Аԥснытәи аалыҵ Ҟрымҟа анагара хықәкыс иамоуп урыстәылатәи апрограммақәа ареспубликаҿы рынагӡара.
"Ҳара ҳнаплакыҩцәа рзы ари цхыраагӡоуп. Ишыжәдыруа еиԥш, аинерт материалқәа рекспорт аус аҿы ашьшьылаҳара ыҟаны иҟан. Уажәы ҳнаплакыҩцәа рыцхырааралеи аекономика аминистрра аҽазышәаралеи ҳара абри аус ҳаиҭазыхынҳәуеит", — иҳәеит Арӡынба.
Иара убасгьы иазгәеиҭеит Аԥсны ишагәҭаку 2019 шықәса рзы аҽа 200 нызқь тонна аинерт материалқәа рынашьҭра. Ареспублика азыхиоуп аҳәаанхыҵҟа миллион тоннак рҟынӡа зхаҭабзиара ҳараку аинерт материал анашьҭра — иҳәеит аминистр.
"Абри азҵаара ҳалацәажәеит ааигәа имҩаԥысыз Петербургтәи аекономикатә форум аҿгьы. Сара сиҿцәажәон Аԥсны иазку азҵаарақәа хылаԥшра рызҭо Аԥыза-министр ихаҭыԥуаҩ ҿыц Витали Мутко, Аԥсны аганахьала алицензиаҟаҵара аԥыхра азҵааразы. Уи иазку ашәҟәы азирхиахьеит Аԥсны Аԥыза-министр Геннади Гагәылиа. Сгәы иаанагоит азҵаара ҵоураны иӡбахап ҳәа", — иҳәеит Адгәыр Арӡынба.
VIII Аԥсны-Урыстәылатәи аусутә форум мҩаԥысит Аҟәа жьҭаара 27 рзы. Афорум еиҿыркааит Аԥсны аекономика аминистрреи Урыстәыла аекономика аҿиара аминистрреи.
