АҞӘА, рашәара 15 – Sputnik, Асида Кәыҵниаԥҳа. Аԥснытәи акәашаҩ Лолита Џьобааԥҳа ахореографиатә ҟазара жәларбжьаратәи аицлабра-фестиваль "Роза Хутор Dance" аҟны актәии аҩбатәии аҩаӡарақәа дырлауреатхеит. Абри атәы Sputnik акорреспондент илзаалыцҳаит акәашаҩ қәыԥш лан Елена Џьобааԥҳа.
"Лолита амилаҭтә кәашара налыгӡеит. Алахәылацәа рҟынтәи лареи Қырҭтәылатәи акәашаҩи роуп асоло ала иқәгылаз. Уадаҩрак ыҟамызт, аха ажиури иреиӷьу ҳәа Лолита даналырх, Қырҭтәылатәи акәашаҩ лхымҩаԥгашьа ҳгәы еихьнашьит", — лҳәоит лара.
Афестиваль аиҿкааҩцәа аџьшьаратә шәҟәқәа рзаарышьҭит Аԥсны Ахада Рауль Ҳаџьымбеи Апарламент адепутат Александр Анқәаби, аҟыбаҩ злоу ахәыҷқәеи аҿари адгылара ахьрырҭо азы.
Уаанӡа, мшаԥы 30 рзы, Аԥснытәи акәашаҩ Лолита Џьобааԥҳа V Жәларбжьаратәи афестиваль-конкурс "Звезды России 2018" актәи алаурет идиплом лоуит.
Рашәара 3 рзы быжьшә рҟынӡа коллектив злахәыз Жәларбжьаратәи афестиваль-аицлабра "Я талант" аҟны акәашаҩ қәыԥш Лолита Џьобааԥҳа Гран-при ланашьахеит аноминациа "Хореографическое искусство. Народный танец" аҟны.
