АҞӘА, рашәара 26 — Sputnik. Адмирал Александр Моисеев Амшынеиқәатә флот акомандаҟаҵаҩыс дҟаҵоуп. Абри азы Аусԥҟа инапы аҵеиҩит Урыстәыла Ахада Владимир Путин, ҳәа аанацҳауеит РИА Новости Амшынеиқәа афлот апресс-маҵзура адыррақәа ҵаҵӷәыс иганы.
"Уаанӡа афлот напхгара азҭоз адмирал Александр Виктор-иԥа Витко аҽа ҭыԥк ахь усураҳәа диагоуп", — ҳәа аҳәоит адырраҭараҿы.
Александр Моисеев арадиотехникатә хәҭа анџьныр иҟынтәи Урыстәыла арратә мчрақәа Рыштаб хада аиҳабы ихаҭыԥуаҩ иҟынӡа амҩа данысит. Диит Калининградтәи аобласт аҿы. А.С. Попов ихьӡ зху арадиоелектроникатә ҵараиурҭеи Кузнецов ихьӡ зху Арра-мшынтә академиеи дрылгеит.
Урыстәылатәи Афедерациа афырхаҵа, ианашьоуп "Арратә лшамҭақәа рзы" аорден, Афырхаҵараз аорден, "Аԥсадгьыл аҿаԥхьа алшамҭақәа рзы" амедал.
