Саида Жьиԥҳа, Sputnik
Есышықәсеиԥш, сынтәагьы, Пицундатәи ауахәама аконцерттә зал аҟны, рашәарамза анҵәамҭа инаркны, есыҽны имҩаԥыслоит, аклассикатә музыка аконцертқәа.
Аԥснытәи Аҳәынҭқарратә филармониа ахкынагӡаҩ, Аԥсны зҽаԥсазтәыз артист, ауарӷанрҳәаҩ Лука Гаделиа иаҳзеиҭеиҳәеит, аԥхын иалагӡаны араҟа иазԥхьагәаҭоу апрограмма атәы.
"Рашәарамза анҵәамҭа инаркны, есшәахьа, Аԥсны зҽаԥсазтәыз артистка Марина Шамԥҳа лааԥхьарала, араҟа иқәгылоит Урыстәылатәи артистцәа, урҭ рхыԥхьаӡараҿы иҟоуп ахкынагӡаҩцәа, аинструменталистцәа. Есҩаша, имҩаԥыслоит Аԥсны зҽаԥсазтәыз артистцәа, ауарӷанрҳәаҩы Марина Шамԥҳаи, апианинорҳәаҩы Алла Оҭыԥҳаи ирзеиԥшу аконцертқәа. Ахашала, Аԥснытәи аҳәынҭқарратә копелла, аԥшьашала акамертә оркестр. Ахәашеи-амҽышеи Марина Шамԥҳаи сареи иаҳзеиԥшу ауарӷантә концертқәа еиҿаҳкаауеит. Сабшала иқәгылоит Аԥснытәи Аҳәынҭқарратә филармониа ахкынаӡаҩцәа", — ҳәа аԥхынтәи аконцерттә программа ҳаилиркааит ауарӷанрҳәаҩы Лука Гаделиа.
Аклассикатә музыка абзиабаҩцәа ирымоуп алшара, Аԥсни, Аҳәаанхыҵи зыхьӡ наҩхьоу акомпозиторцәа рырҿиамҭақәа рзыӡырҩра.
"Ҳара 10 шықәса раахыс Пицундаҟа ԥсшьара ҳаауеит. Абри аамҭа иалагӡаны, иҟамлацт знык ауарӷантә концерт аҿы ҳамнеикәа. Иара убас, егьырҭ аклассикатә музыка аконцертқәагьы ҳаҩҳажьуам. Даара бзиа иаҳбоит аԥсуа артистцәа. Изныкымкәа, Москва ҳақәшәахьеит Лука Гаделиеи Кристина Ешԥҳаи рықәгыларақәа. Уи хымԥада агәахәара дуӡӡа ҳнаҭеит", — рҳәоит Москватәи асасцәа, Виноградоваа рҭаацәа.
Аҭыԥантәи ауааԥсыра ракәзар, гәыԥҩык еицҿакны ирҳәеит акомпозициа "Шьышь наани" азы мацарагьы узымааири ҳәа.
Пицундатәи ауахәамаҿы имҩаԥысуа аконцертқәа рбилеҭқәа рыхә акоуп, адуцәа рзы 600 мааҭ, ахәыҷқәа рзы 200.
Ҭагалан акәзар, цәыббрамза 10 инаркны 14-нӡа традициала иазԥхьагәаҭоуп ауарӷантә фестиваль амҩаԥгра.
