АҞӘА, ԥхынгәы 26 — Sputnik, Бадраҟ Аҩӡба. Ԥхынгәы 26 рзы имҩаԥысит Аԥсны Аминистрцәа Реилазаара изаамҭанытәиу аилатәара. Аилатәараҿы ишьақәырӷәӷәан 1992-1993 шықәсқәа рзтәи Аџьынџьтәылатә еибашьра аинвалидцәа актәи ргәыԥи аибашьраан ироуз ахәрақәа ирыхҟьаны анаҩс аинвалидра заузи есымзатәи рыцхыраагӡа.
"Абри акатегориа иаҵанакуа аинвалидцәа асоциалтә цхыраара рыҭаразы 2018 шықәса ԥхынгәы 1 инаркны ишьақәыргылазааит 10 000 мааҭ итәо есымзатәи ацхыраагӡа", — иҳәеит Аԥсны Аџьеи асоциалтә еиқәыршәареи рминистр Руслан Аџьба.
Аинвалидцәа ацхыраагӡа роулоит иахьҭаҩу аҭыԥ аҿы.
Аԥсны Аџьеи асоциалтә еиқәыршәареи рминистрра ацхыраагӡа ашәара еиҿнакаароуп. Аминистрра есымза афинансқәа рминистррахь инанашьҭлоит ашәаразы азыҳәара.
Ацхыраагӡа ашәаразы есышықәса иныхтәхоит 30 миллион мааҭ, иҳәеит Аџьба.
