АҞӘА, нанҳәа 22— Sputnik, Бадри Есиава. Зых иақәиҭу ақәԥаразы жәларбжьаратәи атурнир "Дружба народов" иалахәуп 190-ҩык рҟынӡа аспортсменцәа ҳәа Sputnik иазеиҭеиҳәоит аицлабрақәа рыӡбаҩ Игор Бераиа.
"Аҟәа араион аспорттә еилакы еиҿнакааз атурнир ахь иааит Аԥсны араионқәа рҟынтәи еиԥш Урыстәылатәи афедерациа ақалақьқәа рҟынтәи аспортсменцәагьы. Зынӡа 197-ҩык аспортсменцәа, 12 — 15 шықәса зхыҵуа алахәхоит", — иҳәеит иара.
"Дружба народов" 2013 шықәса раахыс Аԥсны имҩаԥыргоит. Шықәсы-цыԥхьаӡа иара алахәылацәа рыҩаӡара ҳаракхоит иҳәеит аӡбаҩ.
Зых иақәиҭу ақәԥаразы жәларбжьаратәи атурнир "Дружба народов" мҩаԥысраны иҟоуп Сергеи Багаԥшь ихьӡ зху Аҟәатәи аспорт ахан аҿы нанҳәа 21 — 23 рзы.
