АҞӘА, нанҳәа 23 — Sputnik, Асҭанда Арӡынба. Аҟәатәи ақалақьтә еизара адепутатцәа макьаназы еицҿакрыла изазыразымхеит Аџьармыкьа — Ажәытә ҳабла ареис ала ахатәы автобус абжьаҵара азҵаара.
Азҵаара иаԥшьгамҭоуп адепутат Нарсоу Салаҟаиа. Иара иазгәеиҭеит Аҟәатәи АТП аҟны еиқәшәоу атранспорт шыҟам.
"Абри ахырхарҭаҿы атранспорт аганахь ала апроблема ыҟоуп. Ауааԥсыра ацхыраара иаҳәоит. Сара сылшарала автобус аныҟәара еиҿыскаар сҭахуп. Уи азакәантщ шьаҭа аиуртә шәызсыцхраар, цәыббра акы инаркны 25-ҭыԥ змоу автобус аныҟәара иаласыргон", — иҳәеит иара.
Адепутат иҳәеит атранспорт аҟамзаара еиҳарак изныԥшуа астудентцәа шракәу. Ажәытә ҳаблахь иныҟәоит хә-маршруттә таксик, аха урҭ аус руеит 16:00 сааҭ рҟынӡа.
Аҟәатәи АТП ахантәаҩы Леонид Шәлымба иазгәеиҭеит атранспорт дотациада абри ахырхарҭахь аус шазымуа, ақалақьуаа амаршруттә такси еиҳа рхы ишадырхәо. "Убри азы сара исзеилкаауам ахатәы автобус амҩа изанҵатәу", – иҳәеит иара.
Аилацәажәарақәа рышьҭахьгьы аҟәатәи ақалақьтә еизара адепутатцәа макьаназы еицҿакрыла изазыразымхеит Ажәытә ҳаблахь ахатәы автобус абжьаҵара.
