АҞӘА, цәыббра 4 – Sputnik. Аштатқәа рхада Дональд Трамп аҳәамҭа ҟаиҵеит иазыԥхьагәаҭоу шьамтәылатәи ар Идлиб ржәылара гха дууп ҳәа, Урыстәыла ахьгьы ааԥхьара ҟаиҵоит Башар Асад анырра изыҟанаҵарц ҳәа аанацҳауеит РИА Новости.
"Шьамтәыла Ахада Башар Асад апровинциа Идлиб ажәлара азин имам. Аурысқәеи иранааи агха ду рыхьуеит абри аус рҽаларгалар. Зықьҩыла ауаа ҭахар алшоит. Иалышәмыршан убри аҩыза арыцҳара!" — ҳәа иҩуеит Трамп Twitter аҿы.
Апровинциа Идлиб аҵакыра иахьазы Шьамтәыла аиҳабыратә мчрақәа хылаԥшра арҭаӡом. Уа иҟоу аоппозициаа рымчрақәа роуп.
Аҵыхәтәантәи аамҭазы Шьамтәыла акәша-мыкәша аибарххарақәа цоит.
"Агәыԥ "Хайат Тахрир Аш-Шам" атеррористцәа рҽазыҟарҵоит Дамаск ахимиатә бџьар ахы ианархәоит ҳәа аҽыԥныҳәа аҭара", — иҳәеит Урыстәыла Атәылахьчара аминистрра ахаҭарнак Игор Конашенков.
Пентагон ахада Джеимс Меттис иажәақәа рыла, Шьамтәыла ахимиатә бџьар ахы ианамырхәарц азы Урыстәылеи Еиду аштатқәеи аус еицыруеит.
