АҞӘА, цәыббра 6– Sputnik. Есышықәса имҩаԥырго акциа "Насыԥ змоу цәыббра акы" аҳәаақәа ирҭагӡаны 230 ҭаацәара ацхыраара роуит лҳәеит Ауаажәларратә гәыҳалалратә еиҿкаара "Кьараз" адиректор Камма Гоԥиаԥҳа.
"Гәахәара дула иазгәаҳҭоит хәышәҩык рҟынӡа ахәыҷқәа ашкол маҭәахәқәа шроуз", — лҳәоит лара.
Есышықәса имҩаԥырго акциа "Насыԥ змоу цәыббра акы" традициак аҳасаб ала хышықәса ҵуеит имҩаԥыргоижьҭеи лҳәеит Гоԥиаԥҳа.
"Акциа ҳара ҳзы аҵак ду аманы иҟоуп избанзар хылаԥшра заҳҭо аҭаацәарақәа рзы акыр иуадаҩуп рхәыҷқәа ашкол разырхиара", — лҳәеит лара.
Гоԥиаԥҳа иазгәалҭеит сынтәа адгылара шрырҭаз анаплакқәа "Вина и воды Абхазии", ауараш зауад "Сухумский". Акциа макьанагьы имҩаԥысуеит, ихыркәшам ҳәа лҳәоит Камма Гоԥиаԥҳа.
Нодар Камкиа акциа "Насыԥ змоу цәыббра акы" волонтерс дҟалеит.
"Сара снарыԥхьеит акциа салахәхарц. Даара гәахәарыла уи аус саҿуп", — иҳәеит аволонтер.
Нодар Ԥшьаԥтәи ашкол 10 акласс аҿы дтәоуп. Иара иҳәеит иаԥхьаҟагьы ауаа рыцхраара аус ишациҵо.
Аинформациатә маҵзуреи арадиои Sputnik Аԥсны акциа адгылара анаҭеит, ахәыҷқәа рзы аканцелиартә тауарқәа раахәаразы асертификат афонд ианаҭеит.
