АҞӘА, цәыббра 11– Sputnik, Бадраҟ Аҩӡба. Дамаск ақалақь арҵаҩцәа рконференц-зал ахыбраҿ Аԥсны Аԥыза-министр Геннади Гагәылиа иԥсҭазаара дахьалҵыз инамаданы адышшыларатә шәҟәы хдыртит ҳәа Sputnik акорреспондент изеиҭеиҳәеит Аԥсны Ахәаахәҭра-ааглыхратә палата адәныҟатә еимадарақәеи аинвестициақәеи русбарҭа аусзуҩ Муҳаммед Али Татажь.
"Геннади Гагәылиа абзиараз ҳәа иаҳәара ацеремониа мҩаԥысуеит асааҭ 16:00 инаркны 18:00 рҟынӡа", — иҳәеит иара.
Геннади Гагәылиа машәырла иԥсҭазаара далҵит цәыббра 8 руха. Аԥсыжра ҟалоит цәыббра 12 рзы, Гәдоуҭа. Ареспубликаҿ алахьеиқәратә мшқәа рылаҳәоуп. Ахашаҽны абираҟқәа ларышьҭуеит.
