АҞӘА, цәыббра 14 – Sputnik. Аамҭала Аԥсны аԥыза-министр инапынҵақәа назыгӡо Даур Аршба адныҳәаларатә шәҟәы изишьҭит Урыстәыла аԥыза-министр Дмитри Медведев. Абри атәы аанацҳауеит Аминистрцәа реилазаара асаит.
"Ҳаҭыр зқу Дмитри Анатоли-иԥа! Азин сышәҭ гәык-ԥсык ала шәымшира шәыдысныҳәаларц, ишәзеиӷьасшьарц агәабзиара зҩыда, Аԥсадгьыл амаҵураҿы иреиҳау аҩаӡарақәа. Иарбан ҭакԥхықәратә ҭыԥзаалак шәызхагылоу, шәара иалшәыршоит аекономикатәи асоциалтәи еиҭакрақәа инарҵаулан рырҭбаара", — ҳәа аҳәоит адныҳәалараҿы.
Даур Аршба инаҵшьны иазгәеиҭеит Дмитри Медведев Урыстәыла ахадас иҟазаараан Қырҭтәыла имҩаԥнагаз агрессиа аҭакс Аԥсны Аҳәынҭқарреи Аахыҵ Уаԥстәылатәи Ареспубликеи рхьыԥшымра азхаҵаразы аӡбра адкылара шилиршаз.
"Иахьатәи Урыстәыла ахада Владимир Владимир-иԥа Путини шәареи шәусеицура Урыстәылатәи Афедерациа ашәарҭадара арӷәӷәара апроцесс анырра ду анаҭоит, жәларбжьаратәи аренаҿы ахьӡ-аԥша шьҭнахуеит", — ҳәа иҩуеит иара.
