АҞӘА, цәыббра 18— Sputnik. Урыстәылатәи аҳаирплан Ил-20 шьамтәылатәи аҳауаҽацәыхьчара аракетатә комплекс С-200 ала иаехсны икажьын ҳәа аҳәамҭа ҟарҵеит Урыстәыла атәылахьчара аминистрраҿы ҳәа аанацҳауеит РИА Новости.
"Ил-20, шьамтәылатәи аҳауаҽацәыхьчара аракетатә комплекс С-200 ала иаехсны икажьын", — иҳәеит Урыстәыла атәылахьчара аминистрра аофициалтә хаҭарнак, аинрал-маиор Игор Конашенков.
Урыстәыла атәылахьчара аминистрра адыррақәа рыла цәыббра 17 асааҭ 23:00 рзы авиабаза Хмеимим ахь ихынҳәуаз урыстәылатәи аҳаирплан Ил-20 арадарқәа рҟны ибжьаӡит. Аҳаирплан аекипаж 14-ҩык ыҟан.
Аминистрра адыррақәа рыла иара убри аамҭазы израильтәи аистребительқәа F-16 Латакиа шьамтәылатәи аобиектқәа ирылахысуан, афранцузтә фрегат "Овернь" (Auvergne) аҟынтәи аракетақәа рышьҭуан.
