АҞӘА, цәыббра 19 – Sputnik, Бадраҟ Аҩӡба. Афестиваль "Аԥсны" мҩаԥысуеит Москва, цәыббра 30 рзы, Аиааира 25-шықәса ахыҵра ахьӡала ҳәа Sputnik иазеиҭеиҳәеит Москватәи аԥсуа диаспора анагӡаратә директор Даур Барганџьиа.
"Есышықәса, цәыббра 30 рзы ҳара имҩаԥаагоит еиуеиԥшым ауснагӡатәқәа. Сынтәатәи арыцхә шиубилеитәу ҳахәаԥшны иҳаӡбеит аныҳәа арҭбаара. Ауснагӡатә мҩаԥгахоит аԥсуа диаспора рымацара рзы акәымкәа, Москва инхои иаҭаауеи зегь рзы", — иҳәеит иара.
Ауснагӡатә иалнаршоит Аԥсны ганрацәала арбара.
"Ҳара иаҳҭахуп Аԥсны акультура хыԥхьаӡара рацәала ауаа дырбара. Идҳардырыр ҳҭахуп Аԥсны амандаринақәеи амшыни рыдагьы аҭоурых ҵаула змоу тәыланы ишыҟоу", — иҳәеит иара.
Барганџьиа иҳәеит Аԥснытәи аколлективқәа ахьықәгыло асцена шеиҿкаахо. Аконцерт иалахәхоит аестрадатәи аоператәи шәаҳәаҩцәа, имҩаԥгахоит акәашаратә мастер-класс. Ахәаԥшыҩцәа иара убасгьы афатә-ажәтә мастер-класс рзеиҿкаахоит иҳәеит Даур Барганџьиа.
"Аҭааҩцәа амилаҭтә фатә рыдгалахоит, идырбахоит уи абеиара" ҳәа азгәеиҭеит иара.
Афестиваль аҟны иналукааша хҭысхоит аԥсуа чара дырбара.
"Аԥсуа чара иацу: аҭаца аҩнра лнагашьа, аишәа-чара амҩаԥгашьа уҳәа зегь аарԥшхоит. Иҟалоит ахор. Иаҳҭахуп ажәытә чара дҳарбарц", — иҳәеит Барганџьиа.
Иара убасгьы апроект "Ишьхатәылоу Аԥсны" автор Ҭенгиз Ҭарба афестиваль аҭааҩцәа идирбоит Аԥсны ашьхара аԥшӡара. Апарк "Красная пресня" аҿы аекран дуқәа рыла идырбахоит Аԥсны аԥшӡарақәа.
"Иазыԥхьагәаҭоуп Фазиль Искандер икәакь. Актер Авангард Леонтьев Искандер иажәеинраалақәа дрыԥхьалоит", — иҳәеит Даур Барганџьиа.
Иаартхоит аԥснытәи аалыҵқәа рпавильони атуристтә павильони.
