АҞӘА, цәыббра 20 – Sputnik, Бадраҟ Аҩӡба. Владислав Арӡынба ихьӡ зху Ахьӡ-аԥша амузеи ахь инагоуп 1992-1993 шықәсқәа рзтәи Аԥсны жәлар Рџьынџьтәылатә еибашьра алахәылацәа рцәамаҭәеи рымшынҵақәеи.
Ари акциа мҩаԥгоуп Аиааира 25-шықәса ахыҵра аламҭалаз.
"Аибашьраан сара иҭахаз ирызкны аматериалқәа еизызгон. Уи атәылахьчара аминистрраҟынтәи снапы ианын. Убасҟан исмԥыхьашәеит урыстәылантәи хатәгәаԥхарала иааны еибашьуаз Николаи Лиамин идокументқәа: апаспорт, аттестат, егьырҭ қьаадқәак. Ииасхьоу аамҭақәа ирылагӡаны сара ара игәакьацәа ҳәа уаҩ дысзымԥшааит азы исыӡбеит арҭ адокументқәа Ахьӡ-аԥша амузеи иамаздарц", — ҳәа еиҭалҳәоит ажурналист Екатерина Бебиаԥҳа.
Николаи Лиамин дахьеибашьуази иҭахашьа шыҟалази ртәы ҳәа акгьы сыздырам лҳәоит лара.
"Иара убасгьы ажурналист Анжела Қәычбериаԥҳа исылҭеит хатәгәаԥхарала еибашьуаз аҽаӡәы – Андреи Островски ишәҟәқәагьы. Сара усҟан аибашьраҿ иҭахаз сколлегацәа, ажурналистцәа ирызкны ашәҟәы сыҩуан. Издыруан Андреи Островскии апоетесса Саида Делԥҳаи Маркәыла ишеицҭахаз", — ҳәа азгәалҭоит ажурналист.
"Островски иҭахцәа ҳәагьы уаҩ дызсымԥшааит. Иара Санкт-Петербург диит, дынхон аҽаџьара. Уи идокументқәагьы амузеи аҿы рыҟазаара аҭахны избеит", — лҳәоит Екатерина Бебиаԥҳа.
Николаи Лиамингьы Андреи Островскигьы Мрагыларатәи афронт аҿы еибашьуан.
Ажурналист Анжела Қәычбериаԥҳа еиҭалҳәеит Андреи Островски иӡбахә аинтерес кны иҭылҵаауа дшалагаз.
"Адукат Иван Зарандиа исеиҳәеит Андреи имшынҵеи ипаспорти ҵәахны ишимоу. Усҟан Екатерина Бебиаԥҳа сара дсырҵаҩын, арратә архив аизгара даҿын. Илысҭеит", — лҳәоит лара.
Абарҭ рыдагьы амузеи ахь иааиз аҩбатәи амотохысратә бригада акомандир, Аԥсны Афырхаҵа Геннади Ҷанба иҭаацәа арахь иааргеит апланшет. Уа иҭан акомандир ианҵамҭақәа.
Амузеи афондқәа реиҳабы Лариса Инаԥшьԥҳа ҭабуп ҳәа ахылҳәааит асеиԥш зыхәшьара цәгьу аҳамҭақәа амузеи иахьазнаргаз.
