АҞӘА, цәыббра 25– Sputnik, Бадраҟ Аҩӡба. Рауль Ҳаџьымба иааԥхьарала ConIFA апрезидент Пер Андерс Блинд Аԥсны Аиааира амши Ахьыԥшымра амши 25-шықәса рхыҵраз аныҳәатә уснагӡатәқәа дрылахәхоит. Абри атәы Sputnik иазеиҭеиҳәоит ConIFA апрезидент-ихаҭыԥуаҩ Дмитри Паӷәаа.
"ConIFA апрезидент Пер Андерс Блинд Аԥсныҟа даараны дыҟоуп цәыббра 28 рзы. Ҳара Пер Андерс Блинд ааԥхьара иаҳҭеит Лондон, адунеи ачемпионат анымҩаԥысуаз", — ҳәа еиҭеиҳәоит иара.
Пер Андерс Блинд ааԥхьара идикылеит. Амшныҳәа ауснагӡатәқәа зегьы дрылахәхоит ҳәа аҳәамҭа иуит ConIFA апрезидент-ихаҭыԥуаҩ Дмитри Паӷәаа.
Ихьыԥшым ашьапылампылтә ассоциациақәа рконфедерациа ConIFA шьаҭаркын 2013 шықәса рашәара 7 рзы. Иара еиднакылоит FIFA официалла иалахәым ашьапылампыл азы еизгоу акомандақәа. Иахьатәи аамҭазы ConIFA 40 команда алахәуп.
