АҞӘА, цәыббра 27 – Sputnik. Аԥсны ахада Рауль Ҳаџьымба Владимир Занҭариа аорден "Ахьӡ-Аԥша" ианеишьеит ҳәа аанацҳауеит атәыла ахада исаит.
"Баҩхатәрала ирҿиаратә усуреи, ҳтәыла ауаажәларра-политикатә ԥсҭазаараҿы иааирԥшыз алшамҭа дуқәеи рзы Занҭариа Владимир Константин-иԥа ианашьазааит "Ахьӡ-аԥша" Аорден аҩбатәи аҩаӡара", — ҳәа аҳәоит атәыла ахада Иусԥҟаҿы.
Алитератор, Аԥсны ашәҟәыҩҩцәеи ажурналистцәеи Реидгылақәа рлахәыла, апоет, аиҭагаҩ, иахьатәи аԥсуа литература апроблемақәа ирызку акритикатә статиақәа равтор Владимир Занҭариа еиуеиԥшым амаҵзурақәа ныҟәигахьеит. Аусура хациркит агазеҭ "Аԥсны ҟаԥшь" акорреспондентси Аԥсуа радио акорреспондентси. Аус иуан еиуеиԥшым ауаажәларратә усбарҭақәа рҿы. 1991 – 1996 шықәсқәа рзы Аԥсны Иреиҳаӡоу Асовет депутатс дыҟан, ареспублика акультура аминистрс аус иуан.
2017 шықәса рзы Владимир Занҭариа Дырмит Гәлиа ипремиа далауреатхеит.
