АҞӘА, жьҭаара 29– Sputnik, Бадри Есиава. Аԥсыӡкразы Урыстәыла-аԥснытәи жәларбжьаратәи иаарту ачемпионат иалахәхоит аԥснытәи акомандагьы. Абри атәы Sputnik акорреспондент изеиҭеиҳәеит Аԥсны аԥсыӡкреи ашәарыцареи рыспорт Афедерациа апрезидент Альберт Бондаренко.
"Актәи аиԥылара Аԥсны, аӡиас Бзыбь аҟны имҩаԥган сынтәа, хәажәкырамзазы. Уажәы уи аҭактә еиԥылара мҩаԥгахоит Урыстәыла аҵакыраҿы. Нхыҵ Уаԥстәыла ашьха ӡиасқәа рацәоуп. Урҭ ирҭоу аԥсыӡгьы акыр аратәиқәа иреиԥшуп. Аҭагылазаашьала уагьы араагьы еиԥшуп", — иҳәоит Бондаренко.
Иара иазгәеиҭеит иахьазы ачемпионат алахәразы рҽышҭарыҩхьоу 18 команда: Аԥсны, Донецк, Луганск ркомандақәа акак, Уаԥстәылеиԥш Урыстәыла иаҵанакуа егьырҭ акомандақәа 15. Иҟалоит Ермантәылеи Ҟарачы-Черқьесски ркомандақәагьы рҽаладырхәыр ҳәа.
Аиндаҭлара мҩаԥысуеит асистема "икы-иоужь" ала. Аекологиагьы ԥырхага анаҭом. Уи инамадангьы акомандақәа рхатә харџь ала аԥсыӡ аахәаны аӡы иҭарҵароуп. Бондаренко иажәақәа рыла уи акалмаҳарира иахәарҭоуп.
Аԥсыӡкыҩцәа иркуа аԥсыӡ напыла иакьымскәа, аӡбаҩ ианирбаны, ааха амҭакәа иаразнак иоурыжьроуп.
Убас, Бзыԥ аӡиас аҳәырԥссара иатәым аҵакыраҟны иоурыжьит ачемпионат амҩаԥгара инамаданы 300 —500 кьыла аԥсыӡ. Хыԥхьаӡарала иугозар 2000 цыра акалмаҳа. Афедерациа апрезидент ишиҳәо ала ачемпионат ззырхо аԥсабара ацхраароуп.
Агәыӷра ыҟоуп 2019 шықәса рзы ачемпионат алахәылацәа рхыԥхьаӡара еиҳагьы ихаҭәаап ҳәа, Германиеи Прибалтика атәылақәеи ркомандақәа ралахәхарала.
