АҞӘА, абҵара 13– Sputnik. Беларусиеи СССРи жәлар рартист, акомпозитор Игор Лученок иԥсҭазаара далҵит Минск ақалақь аҿы, 81 шықәса дшырҭагылаз ҳәа аанацҳауеит РИА Новости ансамбль "Сябры" асахьаркыратә напхгаҩы Анатоли Иармоленко иажәақәа шьаҭас иганы.
Абҵарамза алагамҭазы Лученок ақалақьтә хәышәтәырҭахь днаган ихшыбаҩи ишьеи ахьеилаҭәаз иахырҟьаны.
Лученок диит Минск, нанҳәа 6 1938 шықәса рзы. 1982–1986 шш. рзы Лученок Белорусиатәи аҳәынҭқарратә консерваториа аректорс дыҟан. 1980 шықәса рзы Белорусиатәи акомпозиторцәа Реидгыла ахантәаҩыс далырхит. Лученк Беларусиеи СССРи жәлар рартист ҳәа ахьӡ ҳарак ихҵан, Ленин ипремиа далауреатын, Белоруссиа аҳәынҭқарратә премиа далауреатын.
Акомпозитор ирҿиамҭақәа рҿы ахархәара риҭон апоетцәа Ианк Купала, Иакуб Колас, Максим Богданович, Максим Танк, Аркади Кулешов ражәеинраалақәа. Ирацәан Роберт Рождественскии Евгени Евтушенкои ражәеинраалақәа амузыкахь ииаигахьаз. Ирҿиамҭа абзиабаҩцәа ибзианы еицырдыруеит: "Майский вальс", "Мой родной край", "Журавли на Полесье летят", "Вероника", "Алеся", "Очарованная моя".
