АҞӘА, абҵара 20– Sputnik. Ацәыргақәҵа "Транспорт России" аҭааҩцәеи ажурналистцәеи ахәаԥшны ирбеит аплацкарт вагон ҿыцқәа ринтериер ҳәа аанацҳауеит РИА Новости.
"Аплацкартқәа рҟны атәарҭақәеи ашьҭаларҭақәеи аԥардақәа рымоуп, адиуанқәа иреиԥшны еиҿкаауп. Изҭаху аԥарда аркны ихала ихы дазаанхар ауеит", - ҳәа еиҭеиҳәоит амаҵзура акорреспондент.
Иҟоу адыррақәа рыла аплацкарт вагонқәа ахархәарахь ирыҭахар алшоит 2018 шықәса ԥхынҷкәынмза ма 2019 шықәса ажьырныҳәамза инаркны.
Авагон ҿыцқәа рҟны абилеҭ ахәԥса уаанӡатәи ахәԥсақәа иреиҳахом ҳәа ажурналистцәа ирзеиҭеиҳәеит Афедералтә пассаџьыртә еилахәыра адиректор хада Петр Иванов.
"Абилеҭ ахә шыҟац иаанхоит. Иԥсаххаӡом", - иҳәеит Иванов.
Жәларбжьаратәи ацәыргақәҵа "Транспорт России" аҟны, ахолдинг Урыстәылатәи аихамҩақәа астенд аҿы иӡырган аплацкарт вагон ҿыц амакет. Ацәыргақәҵа аатит абҵара 20 рзы аус ауеит абҵара 22 рҟынӡа.́
Ахолдинг ахаҭарнакцәа ражәақәа рыла аплацкарт вагон ҿыцқәа ҳаамҭа иақәшәо еиҿкаауп.
