АҞӘА, абҵара 21 – Sputnik. Аԥснытәи амшынҟәара ааигәара 2014-2015 шықәсқәа рзы ҭырқәтәылатәи аԥсыӡкцәа хыԥхьаӡара рацәала ақьамшьиа ахьыркуаз иахырҟьаны акамшьиа ахыԥхьаӡара акыр икаҳаит ҳәа аанацҳауеит РИА Новости Росрыболовство аиҳабы ихаҭыԥуаҩ Васили Соколов иажәақәа шьаҭас иҟаҵаны.
Иара иҳәеит Урыстәыла есышықәса инарҭбаау аԥсыӡкратә хылаԥшра шымҩаԥырго.
"Аҭагылазаашьа зыхҟьаз ҳәа иаҳшьо Аԥснытәи амшынҟәара ааигәара 2014-2015 шықәсқәа рзы ҭырқәтәылатәи аԥсыӡкцәа хыԥхьаӡара рацәала акамшьиа ахьыркуаз ауп", - иҳәеит иара.
Соколов иажәақәа рыла есышықәса 56-60 нызқь тонн аԥсыӡ ркуан аҭырқәа ԥсыӡкцәа.
"Аиҳаракгьы ирыцҳарахаз аԥсыӡ ркуан- акра аныҟамлоз аамҭазы", - иҳәеит иара.
Азовтәи НИИ адыррақәа рыла сынтәатәи ашықәс азы иркит 23,6 нызқь тонн ақьамшьиа, ҵыԥх — 29,6 нызқь тонн.
