АҞӘА, абҵара 30 – Sputnik, Бадри Есиава. Аԥсны Аҳәынҭқарреи Шьамтәылатәи Арабтә республикеи аекономикатәи, ахәаахәҭратәи, аҭҵаарадырратәи, атехникатәи, акультуратәи усеицуразы аилак аицаԥҵаразы ақәҵара шьақәнарӷәӷәеит Аминистрцәа реилазаара.
"Ҳаҭыр зқәу сколлегацәа. Шәара зегьы еицыжәдыруеит Аԥснытәи аделегациа Шьамтәыла рыҟазаараан аиқәшаҳаҭрақәа анапы шрыҵарҩыз. Аԥсны Аҳәынҭқарреи Шьамтәылатәи Арабтә республикеи аекономикатәи, ахәаахәҭратәи, аҭҵаарадырратәи, атехникатәи, акультуратәи усеицуразы аилак аицаԥҵаразы аиқәшаҳаҭра иазыԥхьагәанаҭоит аусутә гәыԥқәа Аԥснеиԥш Шьамтәылагь раԥҵара, еиуеиԥшым ахырхарҭақәа рыла", - иҳәеит ақәҵара аминистрцәа ирыдгало Адәныҟатәи аусқәа рминистр Даур Ақаҩба.
Аԥсны Аҳәынҭқарреи Шьамтәылатәи Арабтә республикеи аҳәамҭа ҟарҵеит наҟ-ааҟ ишеизхеибаҵои адипломатиатә еизыҟазаашьақәа шрыбжьарҵоит 2018 шықәса лаҵарамза 29 рзы.
Шьамтәылатәи Арабтә республика апарламент аиҩызареи аусеицуреи рзы Аиқәшаҳаҭра аратификациа азнауит 2018 шықәса жьҭаара 11 рзы.
