АҞӘА, ԥхынҷкәын 21 – Sputnik, Бадраҟ Аҩӡба. Аԥсны асахьаҭыхыҩцәа Реидгыла Ацәыргақәҵатә зал аҿы иаартын афотоцәыргақәҵа "Время счастливых находок". Иара азкуп Аԥсны жәлар рартистка Софа Агәмааԥҳа 80-шықәсатәи лиубилеи.
Ауснагӡатә аартуа Аԥсны акультура аминистр Ельвира Арсалиаԥҳа далацәажәеит афотоцәыргақәҵа аартра аидеиа шцәырҵыз.
Аҭааҩцәа ирыдгалан Софа Агәмааԥҳа атеатр асценаҿ лықәгыларақәа раан иҭыхыз афотосахьақәа.
"Сгәы иаанагоит иахьатәи ацәыргақәҵа Софа лыҿиареиԥш Аԥсны атеатртә ҟазарагьы аныԥшуеит ҳәа. Асасцәа ирыдгалоуп 70 фотосахьа", — ҳәа лҳәоит Арсалиаԥҳа.
Афотосахьақәа рыдагьы ацәыргақәҵаҿ ицәырган еиуеиԥшым ақәгыларақәа рафишақәеи ррецензиақәеи.
Аԥсны ахада иабжьагаҩ Владимир Занҭариа даԥхьеит атәыла ахада иҟаиҵаз адныҳәалара.
"Гәык-ҧсыкала ишәыдысныҳәалоит ииубилеитәу 80 шықәса шәхыҵра! С. Ҷанба ихьӡ зху Аҧсуа ҳәынҭқарратә драматә театр апрофессионалтә шьақәгылараҿы шәара иаанышәкылоит ҩашьара зқәым шәхатә ҭыҧ.
Шәбаҩхатәра, шәысценатә ҟазара, шәырҿиаратә ҧышәа ду ахәшьара ҳаракы аиухьеит ахәаҧшцәеи аҟазараҭҵааҩцәеи рганахьала. Атеатр абзиабаҩцәа жәпаҩык ргәы иҭнымҵәо иаанхеит хыҧхьаӡара рацәала шәара инашәыгӡахьоу арольқәа, аҧсуа классикеи адунеитә классикеи рхаҿсахьақәа.
Шәылшамҭақәа рацәоуп актиорцәа ҿарацәа рааӡараҿы, Аҧснытәи аҳәынҭқарратә аҿартә театр апроект аҧҵараҿы, уи асахьаркыратә напхгараҭараҿы. Иара убас шәџьабаақәа дыруп аҧсуа милаҭтә кинематограф аизырҳараҿы, асахьаркыратә рҿиамҭақәа аҧсшәахь реиҭагараҿы.
Аҧсуа телехәаҧшра афонд хадырҭәааит сценаристк, режиссиорк иаҳасабала шәара шәызлахәыз ателефильмқәа. 1978 шықәсазы шәара шәалырххьан Аҧсны Иреиҳаӡоу Асовет адепутатс. 1985 шықәсазы шәырҿиаратә лшамҭа дуқәеи, шәҟазара ҳараки ҳасаб рзуны ишәанашьан "Аҧсны Жәлар рартист" ҳәа ахьӡ ҳаракы, иара убас егьырҭ аҳәынҭқарратә ҳамҭақәа.
Шәиубилеитә мышныҳәа шәыдныҳәало, ишәзеиҕьасшьоит ашықәсынҵыра ду, агәамч ҕәҕәа, арҿиаратә еихьӡара ҿыцқәа!" — ҳәа аҳәоит адныҳәаларатә текст.
Софа Агәмааԥҳа длыдныҳәалеит Аԥсны иҟоу Урыстәыла Ацҳаражәҳәарҭа абжьагаҩ Иури Иасносокирски. Иара дшьамхнышгыланы даԥхьеит Афанаси Фет иажәеинраала "Аве Мария". Абри ашьҭахь Урыстәыла Ацҳаражәҳәаҩ Алексеи Двинианин ихьӡалагь ажәа ԥхақәа леиҳәеит аиубилиар.
Софа Агәмааԥҳа 70 рҟынӡа роль налыгӡахьеит. Урҭ иреиуоуп: Емилиа (Уилиам Шекспир "Отелло"), Регана ("Король Лир"), Наталиа (Антон Чехов "Предложение"), аҭаца (Федерико Гарсиа Лорка "Кровавая свадьба") уҳәа убас ирацәаны.
Афотоцәыргақәҵа аартуп ԥхынҷкәын 23 рҟынӡа, асааҭ 10:00 — 17:00 рыбжьара.
