АҞӘА, ԥхынҷкәын 25 – Sputnik. Аԥсны аҳәынҭстандарт иагәҭакуп Урыстәыла ахархәарахылаԥшра аиқәшаҳаҭра ацнапаҵаҩреи "Асиа еиқәаҵәа" ҳәа иизышьҭо адырразы.
Асиа еиқәаҵәахь иаҵанакуеит Урыстәылатәи Афедерациа аҵакырахь залагалара азин ыҟам иԥаршеиуи зыҿҳәара цахьоуи аалыҵ ҳәа Sputnik иазеиҭеиҳәеит Аԥсны аҳәынҭстандарт ахархәаратәхылаԥшра аҟәша аиҳабы Георги Ҭарба.
"Ҳара иаҳҭахуп "Роспотребнадзори" ҳареи аиқәшаҳаҭра ҳнапы аҵааҩырц, "Асиа еиқәаҵәа" ҳәа изышьҭоу адырразы. Ари асиа – Урыстәыла ззин ыҟам аалыҵ зегь аныԥшуеит. Урҭ рҟынтәи акык ҩбак Аԥсны аҵаратәи ашколқәраҟынӡатәи аусҳәарҭақәа рҟны иаҳԥыхьашәеит", - иҳәеит Ҭарба.
Иара иажәақәа рыла асиа ианыԥшуеит анормақәа ирықәымшәо, зыламыс цқьам ааглыхыҩцәа рҭыжьымҭақәа реиқәыԥхьаӡа.
