АҞӘА, ажьырныҳәа 18 - Sputnik. Шәачатәи аҳазалхыҩцәеи Урыстәыла АШәМ аҳәаахьчаратә Усбарҭа аусзуҩцәеи иаԥдырҟәҟәааит Аԥснынтәи Урыстәылаҟа ииаргоз аҭаҭын аалыҵ. Абри атәы аанацҳауеит Аладатәи аҳазаллхратә усбарҭа.
Аҳазалхратәи аҳәаахьчаратәи гәаҭараан иаанкылан автомашьына ВАЗ 2121, Аԥснынтәи Урыстәылаҟа амҩа иқәыз. Аҳазалхыҩцәа ахархәага ҷыда ала автомашьынаҿ ирыԥшааит иара ашьақәгылашьа иақәымшәоз аиқәара.
Абри ашьҭахь, ашьҭахьтәи апассаџьыртә тәарҭаҿы абылтәы бак ыҟазарц ахьахәҭаз ирыԥшааит 52 блок асигарет (10400 ҭоԥ-цыра).
Амашьына аԥсҟы зкыз, 18-шықәса зхыҵуаз Аԥсны атәылауаҩ амашьына цқьоуп, аҳәаа захыгара ҟамло акгьы ҭам ҳәа иҳәон аҵыхәтәанынӡа.
Иҵәахымҭа шырыԥшаауаз агәра анига иҿа иқәшаҳаҭхеит. Иҳәеит Гагра ақалақь адәқьанқәа руак аҿы ишааихәаз, анаҩс Урыстәыла аҵакыраҿы иҭирц. Имҩанигоз аалыҵ иахәҭоу анорма ишеиҳау дыруа иҵәахит.
"Атауари амашьынеи аанкылоуп. Аҭаҭын аалыҵ аекспертизахь инашьҭуп. Атәылауаҩ иганахь ала административтә усеилагаразы аусҭҵаара хацыркуп", - ҳәа иҳәоит аушьҭырҭатә ҭыԥ "Адлер" аиҳабы Владимир Бондаренко.
2019 шықәса иалагӡаны Шәачатәи аҳазалхыҩцәа административтә зинеилагара аганахь ала 7 уск хацдыркхьеит.
