"Даара ирацәахеит абгассақәеи, абгақәеи абгалаџқәеи, избанзар ақыҭақәа рҟны анхарҭақәа маҷымкәа иҭацәуп. Уаанӡа ауаа иаҳа ирацәан, абнақәа ракәзра еималеит, агыгшәыг бзианы иҿиеит, ауаагьы ирыцрасуеит. Излауала ҳаҿуп рнырҵәара, аха макьана лҵшәа бзиак ҳнамҭацт. Уаанӡа ақыҭанхамҩа аминистрра ҳрыҳәан, ашәарыцаҩцәа рхеилак Очамчыра араион администрациа аԥара рзоунажьуан. Абга зшьыз 1000 мааҭ иоуан, абгалаџ азы 500 мааҭ. Уи рацәам, аха ауаа ирыхәон, ашәарыцаҩцәа азҿлымҳан, ишьны алымҳақәа наргон, аԥарагьы патронк ахә роуан, ргәы ҟанаҵон. Уи апрограмма алҵшәа аман", - ҳәа азгәеиҭеит Кәыҵниа.
Иара иажәақәа рыла, Кындыӷ ақыҭауаа иҟарҵаз аҳәарала иҳаҩсыз амҽышазы агыгшәыгқәа ирзышәарыцеит аҭыԥан инхо реиԥш ашәарыцаҩцәеи аԥсыӡкцәеи реилазаара иалоу ақалақь аҟынтә инеиз ашәарыцаҩцәагьы. Уи иалҵшәахеит абгалаџқәа фба рышьра.
"Абга ҳшьыр ҳҭахын, аха иаҳҿамҳаит. Уажәы даҽа қыҭак аҟны ҳшәарыцар ҳҭахуп. Аха агыгшәыгқәа рхыԥхьаӡара рацәахеит. Ус унадаххыланы иуӡбо проблемам", - иҳәеит Кәыҵниа.
Инеиҵыху аицәажәара шәазыӡырҩыр шәылшоит арадио Sputnik Аԥсны аефир аҿы.
