"Сергеи Михаил-иԥа идипломтә усумҭа амҳаџьырра иазкын, уи атема дазыхынҳәауан анаҩс ирҿиараҟны. Ирацәоуп апатреҭтә жанр ала аԥсуа быргцәа нагақәа рхаҿсахьақәа иаанижьыз. Еиҳаракгьы аҿыханҵа аҟны акәын иҽахьԥишәоз, иара убасгьы ашәҟәқәа сахьала еиқәиршәон. Иара иусумҭақәа ыҟоуп асахьаҭыхратә галереиаҟны, иҷкәын (асахьаҭыхҩы Лаша Габелиа - аред.) иҟазарҭаҟны, ирацәоуп иусумҭақәа аҳәаанхыҵ агалериақәа рахь иагаз, ахатә коллекциақәа рҟны иҟоу. Сергеи Габелиа аԥсуа сахьаҭыхратә ҟазараҟны иаарылҳәҳәо ҳәа иҟоу дреиуоуп. Иуаҩышьа бзиан, инакәызаалак аӡәы игәы иалсуа аҳәара иҟазшьамызт, дҩыза бзиан, даԥхьагылаҩын", - иҳәеит Ҵәыџьба.
Аԥсны зҽаԥсазтәыз асахьаҭыхыҩ Сергеи Габелиа диижьҭеи 80 шықәса ҵит ажьырныҳәа 23 рзы. Иара ҩажәа шыкәса инареиҳаны Аԥсны асахьаҭыхыҩцәа реидгыла напхгара аиҭон. Сергеи Михаил-иԥа Аԥсны Аџьынџьтәылатә еибашьраан "Ажәеиԥшьаа" ҳәа акарикатуристцәа реилазаара еиҿызкааз дреиуоуп.
Асахьаҭыхҩы ихатә цәыргакәҵа шыҟаимҵацызгьы, зыхә ҳаракны иршьо аусумҭақәа аԥиҵахьан. Сергеи Габелиа иԥсҭазаара далҵит 57 шықәса шихыҵуаз. Сынтәа диижьҭеи 80 шықәса аҵра инамаданы иусумҭақәа рцәыргақәаҵа аиҿкааразы агәҭакы ыҟоуп.
Инеиҵыху аицәажәара шәазыӡырҩыр шәылшоит арадио Sputnik Аԥсны аефир аҿы.
