АҞӘА, ажьырныҳәа 28 – Sputnik. Архип Куинджи иусумҭа "Ай-Петри Крым" зӷьычыз ауаҩы даанкылоуп, аусумҭа ԥшаауп Одинцовтәи араион аҿы. Абри атәы аанацҳауеит РИА Новости.
Амаҵзура адыррақәа рыла 31-шықәса зхыҵуа ахаҵа, уаанӡа анаркотикқәа рымазааразы идырбаандаҩхьаз, даанкылоуп.
Аилкаара иаҿуп иара ицыз рхаҭарақәа. Аусҭҵаара мҩаԥысуеит ҳәа лҳәеит Урыстәыла ААР аофициалтә хаҭарнак Ирина Волк.
Уаанӡатәи адыррақәа рыла Архип Куинджи иҭыхымҭа "Ай-Петри. Крым" Третьяковтәи агалереи аҟынтәи ирӷьычит ажьырныҳәа 27 рзы.
Акультура аминистрра адыррақәа рыла аусумҭа аԥгаԥсатә хәыԥса иартәоит 12 миллион мааҭ.
